سی ٹی ڈی کی کارروائی، پاک پتن سے را کا خطرناک دہشت گرد گرفتار

کاؤنٹر ٹیررازم ڈیپارٹمنٹ (سی ٹی ڈی) پنجاب نے صوبے کے مختلف اضلاع میں 98 انٹیلی جنس بیسڈ آپریشنز کے دوران مختلف کالعدم تنظیموں کے 13 خطرناک دہشت گردوں کو گرفتار کر لیا ہے۔ سی ٹی ڈی ترجمان کے مطابق پاکپتن سے بھارتی خفیہ ایجنسی ‘را’ (RAW) سے تعلق رکھنے والا انتہائی خطرناک دہشت گرد واجد بھی پکڑا گیا ہے۔ گرفتار دہشت گردوں کی شناخت عثمان، نعیم، عبدالمنان، واجد، اسامہ، حسن اور بابر کے ناموں سے ہوئی ہے۔ ملزمان کے قبضے سے ہینڈ گرنیڈ، 3 آئی ای ڈی بم، 12 ڈیٹونیٹرز، 35 فٹ فیوز وائر اور بڑی مقدار میں دھماکہ خیز مواد برآمد کیا گیا ہے۔

ترجمان سی ٹی ڈی کے مطابق گرفتار دہشت گردوں کے خلاف مختلف تھانوں میں 13 مقدمات درج کر کے تفتیش کا آغاز کر دیا گیا ہے۔ اس کے علاوہ رواں ہفتے کے دوران صوبہ بھر میں سیکیورٹی کو یقینی بنانے کے لیے 1,595 کومبنگ آپریشنز کیے گئے، جن کے دوران 55,416 افراد کے کوائف کی جانچ پڑتال کی گئی اور 52 مشتبہ افراد کو حراست میں لیا گیا۔ ترجمان نے عزم ظاہر کیا کہ محفوظ پنجاب کے ہدف کے حصول کے لیے دائرہ کار مزید وسیع کیا جا رہا ہے۔