ڈیفنس رہائشی عمارت جھگڑا کیس، دو ملزمان کی ضمانت منظور

کراچی کی ایڈیشنل ڈسٹرکٹ اینڈ سیشن عدالت (جنوبی) نے ڈیفنس کی ایک رہائشی عمارت میں دو فیملیز کے درمیان ہونے والے جھگڑے کے کیس میں نامزد ملزمان نور العین اور علی حسن کی قبل از گرفتاری ضمانت منظور کر لی ہے۔ عدالت نے دونوں ملزمان کو 20، 20 ہزار روپے کے مچلکے جمع کرانے کا حکم دیا۔ سماعت کے دوران درخواست گزاروں کے وکیل ارشاد شاہ نے موقف اختیار کیا کہ ان کے موکلین اپارٹمنٹ کی تیسری منزل پر رہتے ہیں جبکہ مدعی چوتھی منزل پر مقیم ہیں۔ سی سی ٹی وی فوٹیج سے واضح ہے کہ مدعی اپنے بیٹے، پولیس اہلکار اور سکیورٹی گارڈ کے ساتھ خود جارحانہ انداز میں تیسری منزل پر آئے۔ انہوں نے مزید کہا کہ پولیس کے پاس کوئی پرائیویٹ گواہ بھی نہیں ہے۔ واضح رہے کہ تھانہ درخشاں میں ملزمان کے خلاف خواتین کی بے حرمتی، دھمکیاں دینے اور زخمی کرنے کے الزامات کے تحت مقدمہ درج کیا گیا تھا۔