کور کمانڈرز کانفرنس،بھارتی سپانسرڈ دہشتگردوں، سہولت کاروں سے بغیر رعایت نمٹا جائیگا

فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز کی زیر صدارت 273ویں کور کمانڈرز کانفرنس منعقد ہوئی۔ فورم نے دہشت گردی کے حالیہ واقعات میں شہید ہونے والے معصوم شہریوں، مسلح افواج اور قانون نافذ کرنے والے اداروں کے اہلکاروں کے لیے فاتحہ خوانی اور خراجِ عقیدت پیش کیا۔

کانفرنس میں اندرونی و بیرونی سلامتی کی صورتحال کا جامع جائزہ لیتے ہوئے بھارتی سرپرستی میں دہشت گردی کے خلاف بلاامتیاز اور فیصلہ کن کارروائی کے عزم کا اظہار کیا گیا۔ فورم نے دہشت گردی، جرائم اور سیاسی مفادات کے گٹھ جوڑ کو مسترد کرتے ہوئے قومی یکجہتی اور استحکام پر کوئی سمجھوتہ نہ کرنے کا اعلان کیا۔

شرکاء نے بلوچستان میں ترقیاتی اقدامات کو سراہا، قومی ایکشن پلان کے تحت عوامی فلاحی اقدامات بڑھانے پر زور دیا، کشمیری عوام کے حق خودارادیت اور فلسطین پر پاکستان کے اصولی مؤقف کی توثیق کی۔ آرمی چیف نے افواج کی آپریشنل تیاری، پیشہ ورانہ مہارت اور ہر نوع کے خطرات سے نمٹنے کی صلاحیت پر مکمل اعتماد کا اظہار کیا۔