برازیل میں کوپ 30 پویلین میں آگ، ہزاروں مندوبین محفوظ مقام پر منتقل

برازیل میں جاری اقوامِ متحدہ کی موسمیاتی کانفرنس کوپ 30 کے دوران پویلین میں اچانک آگ بھڑک اٹھی، جس کے بعد شرکاء میں خوف و ہراس پھیل گیا۔

خبر رساں اداروں کے مطابق آگ برازیل کے شہر Belém میں قائم کانفرنس پویلین میں لگی، جہاں مختلف ممالک اور اداروں کے اسٹالز موجود تھے۔ واقعے کے فوراً بعد ہنگامی امدادی ٹیمیں موقع پر پہنچیں اور پویلین کو مکمل طور پر خالی کرالیا گیا۔

عینی شاہدین کے مطابق آگ بڑھنے کے بعد مندوبین گھبراہٹ میں باہر کی طرف دوڑ پڑے، جبکہ منتظمین نے فوری انخلا کراتے ہوئے ہزاروں شرکاء کو محفوظ مقام پر منتقل کیا۔

برازیل کے وزیرِ سیاحت سیلسو سبینو کا کہنا ہے کہ آگ پر قابو پا لیا گیا ہے اور خوش قسمتی سے کسی قسم کے جانی نقصان کی اطلاع موصول نہیں ہوئی۔

انتظامیہ کے مطابق واقعے کے بعد کوپ 30 کی آج کی تمام سرگرمیاں منسوخ کر دی گئی ہیں، جب کہ آگ لگنے کی وجوہات جاننے کے لیے تحقیقات جاری ہیں۔