ایران جنگ کی مخالفت: ایرانی نژاد امریکی رکن کانگریس یاسمین انصاری کو دھمکیاں

ایرانی نژاد امریکی رکن کانگریس یاسمین انصاری نے انکشاف کیا ہے کہ ایران کے خلاف جنگ کی مخالفت اور امریکی وزیر دفاع پیٹ ہیگستھ کے مواخذے کی تحریک شروع کرنے کے بعد سے انہیں، ان کے اہل خانہ اور عملے کو سنگین دھمکیوں کا سامنا ہے۔ یاسمین انصاری کے مطابق، ان کے خلاف ایک منظم مہم چلائی جا رہی ہے جس میں مصنوعی ذہانت (AI) سے تیار کردہ جعلی تصاویر اور ان کی شہریت سے متعلق بے بنیاد الزامات کا سہارا لیا جا رہا ہے۔

یاسمین انصاری نے سوشل میڈیا پلیٹ فارم ‘ایکس’ پر جاری بیان میں واضح کیا کہ یہ حملے دراصل ایک “ناکام اور غیر قانونی جنگ” سے عوامی توجہ ہٹانے کی کوشش ہیں۔ انہوں نے عزم ظاہر کیا کہ وہ نسل پرستانہ اور خواتین مخالف بیانیے کے باوجود امریکی صدر اور وزیر جنگ کی پالیسیوں کے خلاف آواز بلند کرتی رہیں گی، تاہم اپنے عملے اور خاندان کے خلاف کسی بھی قسم کی دھمکی کو برداشت نہیں کریں گی۔