پاکستان میں انشورنس پینیٹریشن جی ڈی پی کا صرف 0.7 فیصد ہے: سی سی پی

کمپیٹیشن کمیشن آف پاکستان (CCP) کی جانب سے جاری کردہ تازہ ترین رپورٹ کے مطابق پاکستان میں انشورنس پینیٹریشن کا تناسب مجموعی قومی پیداوار (GDP) کا صرف 0.7 فیصد ہے، جبکہ ملک میں فی کس انشورنس اخراجات محض 12 امریکی ڈالر ہیں۔ کمپیٹیشن کمیشن کے چیئرمین فرید احمد نے اس بات کی نشاندہی کی ہے کہ پاکستان میں انشورنس سیکٹر کے فروغ کے بے پناہ اور وسیع امکانات موجود ہیں۔ ان کا کہنا تھا کہ مارکیٹ میں موثر اور شفاف کمپیٹیشن قائم کرنے سے اس شعبے میں جدت، خدمات کا معیار بہتر بنانے اور صارفین کو مزید انتخاب فراہم کرنے میں مدد مل سکتی ہے۔

سی سی پی کے مطابق اس وقت پاکستان میں کل 44 انشورنس کمپنیاں فعال ہیں، جن میں 36 روایتی انشورنس کمپنیاں، 7 تکافل آپریٹرز اور ایک ری انشورنس کمپنی شامل ہے، جبکہ ملک بھر میں انشورنس پالیسیوں کی مجموعی تعداد تقریباً 1 کروڑ 4 لاکھ ہے۔ رپورٹ میں نشاندہی کی گئی ہے کہ مارکیٹ میں چند بڑی کمپنیوں کے ارتکاز، نئی کمپنیوں کے داخلے کی رکاوٹوں، بینک اشورنس، عوامی آگاہی میں کمی اور معلومات کے عدم توازن کی وجہ سے انشورنس کا شعبہ شدید چیلنجز کا شکار ہے۔ اس کے علاوہ کلیمز کی ادائیگی میں تاخیر اور تنازعات بھی صارفین کے اعتماد کو متاثر کرتے ہیں۔ سی سی پی اجلاس میں کلیمز کے تصفیے کو شفاف بنانے، لازمی انشورنس کا مؤثر نفاذ کرنے، زرعی انشورنس کے دائرہ کار کو وسعت دینے، رسک بیسڈ سالوینسی فریم ورک اپنانے اور ‘انشورنس بل 2026ء’ پر تفصیلی تبادلہ خیال کیا گیا۔