مشکلات اور چیلنجز کے باوجود امید کا دامن کبھی نہیں چھوڑنا چاہیے: مریم نواز

وزیراعلیٰ پنجاب مریم نواز شریف نے امید کے عالمی دن کے موقع پر اپنے خصوصی پیغام میں کہا ہے کہ مشکلات اور چیلنجز کے باوجود ہمیں امید کا دامن کبھی نہیں چھوڑنا چاہیے۔ امید ایک ایسا مثبت جذبہ ہے جو انسان کو مایوسی کے اندھیروں میں بھی روشنی کی کرن تلاش کرنے کی آس دلاتا ہے اور آگے بڑھنے کی طاقت دیتا ہے۔ اگر ہم ہمت اور حوصلہ کریں تو یہی امید کی روشنی، یقین کا چمکتا ہوا سورج بن جاتی ہے۔

وزیراعلیٰ پنجاب کا کہنا تھا کہ پاکستان مسلم لیگ (ن) اب عوام کی حقیقی امید بن چکی ہے اور وہ پاکستانی قوم کی ان امیدوں پر پورا اترنے کے لیے دن رات مخلصانہ کوششیں کر رہے ہیں۔ انہوں نے ماضی کا حوالہ دیتے ہوئے کہا کہ عوام کو یہ امید تھی کہ جب مسلم لیگ (ن) اقتدار میں آئے گی تو ہی انہیں لیپ ٹاپ، اسکالرشپ اور مفت ادویات جیسی سہولیات ملیں گی۔

مریم نواز شریف نے مستقبل کے عزائم کا اظہار کرتے ہوئے مزید کہا کہ انہیں قوی امید ہے کہ اب پنجاب کے عوام کو صحت کی بہترین سہولتیں میسر آئیں گی، صوبے کے ہر بے گھر فرد کا اپنی چھت کا خواب پورا ہوگا اور پنجاب کا ہر کسان اپنی لہلہاتی فصلیں دیکھ کر خوش اور خوشحال ہوگا۔