کیپٹن کرنل شیر خان شہید کی قربانی قوم کیلئے باعثِ فخر ہے: مریم نواز

وزیراعلیٰ پنجاب مریم نواز شریف نے کارگل جنگ کے ہیرو اور نشانِ حیدر پانے والے کیپٹن کرنل شیر خان شہید کے یومِ شہادت پر انہیں زبردست خراجِ عقیدت پیش کرتے ہوئے کہا ہے کہ شہیدِ وطن کی عظیم قربانی پوری قوم کے لیے باعثِ فخر ہے۔

اپنے ایک خصوصی پیغام میں وزیراعلیٰ پنجاب نے کہا کہ پاکستانی قوم اپنے اس بہادر سپوت کو دل سے سلام پیش کرتی ہے۔ کیپٹن کرنل شیر خان شہید نے جس جرات، بے مثال بہادری اور غیر متزلزل عزم کے ساتھ وطنِ عزیز کا دفاع کیا، اس نے دشمن کے دلوں پر بھی ہیبت طاری کر دی تھی۔ انہوں نے مزید کہا کہ یہ ہمارے لیے بڑے اعزاز کی بات ہے کہ خود دشمن بھی کیپٹن کرنل شیر خان شہید کی شجاعت اور غیر معمولی دلیری کا معترف ہے۔

مریم نواز شریف نے عزم کا اظہار کرتے ہوئے کہا کہ ارضِ پاک کے دفاع کے لیے دی جانے والی یہ عظیم قربانی تاریخ میں ہمیشہ سنہری حروف سے یاد رکھی جائے گی۔ انہوں نے واضح کیا کہ پاکستانی قوم اپنے شہداء کی لازوال خدمات، وطن سے محبت اور لازوال ایثار کو ہمیشہ انتہائی قدر و احترام کی نگاہ سے دیکھتی رہے گی۔