مون سون، ہیٹ ویو اور اربن فلڈنگ کا خدشہ، تمام ادارے الرٹ رہیں: مریم نواز

وزیراعلیٰ پنجاب مریم نواز شریف نے خبردار کیا ہے کہ جولائی، اگست اور ستمبر کے دوران صوبے میں درجہ حرارت میں شدید اضافے اور اربن فلڈنگ کا بڑا خدشہ ہے، اس لیے تمام متعلقہ ادارے الرٹ رہیں۔ ایک اعلیٰ سطح کے اجلاس سے خطاب کرتے ہوئے انہوں نے کہا کہ موسمیاتی تبدیلی ایک مسلمہ حقیقت ہے اور بعض شہروں میں درجہ حرارت 52 ڈگری سینٹی گریڈ تک جا سکتا ہے، جبکہ کچھ علاقوں میں معمول سے زیادہ بارشوں کی پیشگوئی بھی کی گئی ہے۔ انہوں نے بتایا کہ مون سون اور ہیٹ ویو سے نمٹنے کے لیے پیشگی اقدامات کے تحت ارلی وارننگ سسٹم کو فعال کر دیا گیا ہے، جبکہ ریسکیو اور دیگر اداروں کو موک ایکسرسائزز جاری رکھنے اور مویشیوں کے لیے خوراک کا بندوبست مکمل کرنے کی ہدایت کی گئی ہے۔ انہوں نے شہریوں، بالخصوص بزرگوں اور بچوں کو ہیٹ ویو کے دوران غیر ضروری طور پر گھروں سے باہر نہ نکلنے کی تاکید بھی کی۔

وزیراعلیٰ نے پنجاب حکومت کے انتظامات کو تسلی بخش قرار دیتے ہوئے کہا کہ صوبے میں بارش کا پانی فوری نکال دیا جاتا ہے، جبکہ دیگر جگہوں پر پانی کھڑا رہتا ہے۔ اجلاس کے دوران انہوں نے ایک اور اہم اعلان کرتے ہوئے بتایا کہ کاہنہ جیسے ناخوشگوار سانحات کی مستقل روک تھام کے لیے پنجاب حکومت نے “اپنا گھر، محفوظ گھر” پروگرام شروع کر دیا ہے۔ اس سکیم کے تحت پنجاب بھر کے شہری اپنے گھروں کو محفوظ بنانے کے لیے درخواست دے سکتے ہیں، جس کے لیے حکومت کی جانب سے 10 لاکھ روپے تک کا بلاسود (انٹرسٹ فری) قرض فراہم کیا جائے گ