وزیراعلیٰ کی وزیر تعلیم کو ہر ہفتے ایک سکول میں خود کلاس لینے کی ہدایت

وزیراعلیٰ پنجاب مریم نواز شریف کی زیرِ صدارت منعقدہ ایک خصوصی اجلاس میں اسکول ایجوکیشن ڈیپارٹمنٹ کی کارکردگی پر تفصیلی بریفنگ دی گئی۔ اجلاس کے دوران وزیراعلیٰ نے ایک منفرد اور احسن فیصلہ کرتے ہوئے صوبائی وزیرِ تعلیم رانا سکندر حیات کو ہدایت کی ہے کہ وہ ہر ہفتے خود کسی ایک سرکاری اسکول کا دورہ کر کے وہاں کلاس لیں۔

اجلاس میں بتایا گیا کہ پنجاب کے سرکاری اسکولوں میں گزشتہ دو سال چار ماہ کے دوران 43 لاکھ نئے طلبہ کی انرولمنٹ (داخلہ) کا ہدف کامیابی سے پورا کر لیا گیا ہے، جو کہ ماضی قریب کی نسبت سرکاری اسکولوں میں سب سے زیادہ حقیقی داخلوں کا ایک منفرد ریکارڈ ہے۔ اس کے علاوہ پنجاب ایجوکیشن فاؤنڈیشن (PEF) کے اساتذہ کی تنخواہوں کی ادائیگی شفاف بنانے کے لیے ڈیجیٹل پیمنٹ کو لازمی قرار دے دیا گیا ہے، جس کے تحت ایک لاکھ 38 ہزار پیف اساتذہ کے بینک اکاؤنٹس کھولے جائیں گے۔

وزیراعلیٰ پنجاب نے پرائیویٹ اسکولوں کی رجسٹریشن کے لیے ڈیجیٹل میکانزم کا جائزہ لینے کی ہدایت کی اور صوبے بھر میں کام کرنے والے ٹیوشن سینٹرز کی رجسٹریشن کے لیے فوری تجاویز طلب کر لیں۔ انہوں نے ٹیوشن سینٹرز کی ڈیجیٹل میپنگ کے لیے بھی مؤثر طریقہ کار وضع کرنے کا حکم دیا۔ مریم نواز شریف نے پبلک اسکول ری آرگنائزیشن پروگرام (PSRP) پر بریفنگ کے دوران محکمے کے اختراعی ذرائع آمدن (Innovative Revenue Sources) کے امکانات کا جائزہ لیا اور اس حوالے سے ایک جامع پلان طلب کر لیا ہے۔