مریم نواز مری پہنچ گئیں، منگل کو اہم اجلاس طلب کرلیا

وزیراعلیٰ پنجاب مریم نواز شریف نے سیاحتی مقام مری میں جاری ترقیاتی منصوبوں اور بحالی کے کاموں کا تفصیلی جائزہ لینے کے لیے کل ایک اہم اجلاس طلب کر لیا ہے۔ پارٹی ذرائع کے مطابق وزیراعلیٰ مریم نواز خصوصی طیارے کے ذریعے لاہور سے اسلام آباد پہنچ گئی ہیں، جہاں منعقدہ اعلیٰ سطحی اجلاس میں انہیں مری میں جاری مختلف ترقیاتی سکیموں پر جامع بریفنگ دی جائے گی۔ اس اجلاس کی خاص بات سابق وزیراعظم نواز شریف کی شرکت بھی ہوگی، جہاں ‘مری ڈیولپمنٹ پلان’ کے اہم پہلوؤں پر وزیراعلیٰ اور نواز شریف کے درمیان خصوصی مشاورت متوقع ہے۔

اجلاس کے دوران مری کی تاریخی مال روڈ اور اہم شاہراہ جھیکا گلی چوک کی ازسرنو تعمیر و بحالی سے متعلق تجاویز و منصوبوں پر غور کیا جائے گا۔ ذرائع نے مزید بتایا کہ اجلاس میں مال روڈ ہل سائیڈ کی اراضی سے متاثرہ افراد کو معاوضوں کی ادائیگی کے انتظامی و مالی معاملات کا جائزہ بھی لیا جائے گا۔ واضح رہے کہ مسلم لیگ (ن) کے قائد اور سابق وزیراعظم نواز شریف گزشتہ ایک ہفتے سے مری کے قریب چھانگلہ گلی میں قیام پذیر ہیں اور خطے کی مجموعی اور سیاحتی ترقیاتی منصوبوں میں خصوصی دلچسپی لے رہے ہیں۔