یومِ عاشور پر بہترین انتظامات، سہیل آفریدی کا پولیس اور انتظامیہ کو خراجِ تحسین

وزیراعلیٰ خیبرپختونخوا سہیل آفریدی نے یومِ عاشور کے موقع پر صوبائی دارالحکومت پشاور میں مرکزی جلوس کے اہم مقام کوہاٹی کا دورہ کیا اور وہاں سکیورٹی و دیگر انتظامی انتظامات کا تفصیلی جائزہ لیا۔ اپنے دورے کے دوران وزیراعلیٰ نے جلوس کے روایتی راستوں پر کیے گئے سکیورٹی اقدامات کا معائنہ کیا اور صوبے بھر میں یومِ عاشور کے پرامن اور منظم انعقاد کے لیے ضلعی انتظامیہ، خیبرپختونخوا پولیس اور دیگر قانون نافذ کرنے والے اداروں کی کارکردگی کو سراہا۔وزیراعلیٰ سہیل آفریدی نے بہترین اور فول پروف انتظامات کو یقینی بنانے پر صوبے کی تمام ضلعی انتظامیہ اور پولیس فورس کو خراجِ تحسین پیش کرتے ہوئے کہا کہ زائرین اور عزاداروں نے بھی سکیورٹی کے مؤثر انتظامات پر اطمینان کا اظہار کیا ہے، جو تمام متعلقہ اداروں کی دن رات کی محنت کا منہ بولتا ثبوت ہے۔اس موقع پر گفتگو کرتے ہوئے وزیراعلیٰ خیبرپختونخوا کا کہنا تھا کہ معرکہ کربلا ہمیں ظلم و ستم کے خلاف ڈٹ جانے، حق و صداقت پر قائم رہنے اور عظیم قربانی کا لازوال درس دیتا ہے۔ معاشرے میں اتحاد، بھائی چارے، اخوت اور اسلامی اقدار کے فروغ کے لیے کربلا کے آفاقی پیغام کو دل سے اپنانا وقت کی اہم ضرورت ہے۔ سہیل آفریدی نے اس عزم کا اعادہ کیا کہ صوبائی حکومت عوام کے جان و مال کے تحفظ اور تمام مذہبی اجتماعات کے پرامن اور محفوظ انعقاد کے لیے اپنے ہر ممکن اقدامات کا سلسلہ آئندہ بھی جاری رکھے گی۔