دہشتگردی کے خلاف جنگ کو قبائلی یا قومی لڑائی نہ سمجھا جائے: سرفراز بگٹی

وزیراعلیٰ بلوچستان سرفراز بگٹی نے واضح کیا ہے کہ صوبے میں دہائیوں پرانے قبائلی تنازعات کو مقامی اور قبائلی روایات کے مطابق ہی حل کیا جائے گا، تاہم دہشت گردی کے خلاف جاری ریاستی جنگ کو کسی بھی طور پر قبائلی یا قومی لڑائی نہ سمجھا جائے۔ کوئٹہ میں صحافیوں سے گفتگو کرتے ہوئے وزیراعلیٰ نے کہا کہ آئندہ مالی سال کی ترقیاتی حکمتِ عملی میں ان علاقوں کو ترجیح دی جائے گی جہاں ماضی میں کوئی کام نہیں ہو سکا۔ انہوں نے افسوس کا اظہار کیا کہ ماضی میں اعلیٰ سرکاری اور سیاسی عہدوں پر براجمان شخصیات نے اپنے ہی علاقوں اور لوگوں کو یکسر نظر انداز کیا۔

سرفراز بگٹی نے کہا کہ موجودہ صوبائی حکومت کے نزدیک تمام اضلاع اور شہری مساوی اہمیت رکھتے ہیں۔ انہوں نے تعلیمی و صحتی اصلاحات کا ذکر کرتے ہوئے بتایا کہ مکمل میرٹ پر کنٹریکٹ اساتذہ کی شفاف بھرتیوں کے باعث صوبے کے 99 فیصد اسکول فعال ہو چکے ہیں، نیز کنٹریکٹ اساتذہ اور ملازمین کے لیے ایک جدید پنشن اسکیم بھی متعارف کرائی جا رہی ہے۔ وزیراعلیٰ بلوچستان کا مزید کہنا تھا کہ صوبائی حکومت کی جانب سے صحت اور تعلیم سمیت بنیادی ڈھانچے میں کی جانے والی ان انقلابی اصلاحات کو ناصرف پاکستان بلکہ عالمی سطح پر بھی سراہا جا رہا ہے۔