سرفراز بگٹی کی چوہدری شجاعت سے ملاقات، بلوچستان کی صورتحال پر گفتگو

وزیراعلیٰ بلوچستان میر سرفراز احمد بگٹی نے مسلم لیگ (ق) کے سربراہ اور سابق وزیراعظم چوہدری شجاعت حسین سے ان کی رہائش گاہ گلبرگ، لاہور میں ملاقات کی۔ اس موقع پر وفاقی وزیر چوہدری سالک حسین بھی موجود تھے۔ ملاقات کے دوران وزیراعلیٰ بلوچستان نے چوہدری شجاعت حسین کی مزاج پرسی کی اور ان کی صحت و تندرستی کے لیے نیک خواہشات کا اظہار کیا۔

ملاقات میں بلوچستان کی مجموعی سیاسی صورتحال، صوبے میں امن و امان کی فضا، جاری ترقیاتی منصوبوں اور عوامی مسائل سمیت باہمی دلچسپی کے امور پر تفصیلی تبادلہ خیال کیا گیا۔ اس موقع پر دونوں رہنماؤں نے بلوچستان کی ترقی و خوشحالی کے لیے پائیدار اور مؤثر اقدامات اٹھانے کی ضرورت پر زور دیا اور عوامی مسائل کے حل کے لیے باہمی تعاون و مشاورت کو مزید فروغ دینے پر اتفاق کیا۔