سیکا اجلاس: اسرائیلی صدر کے خطاب کے دوران 10 ممالک کے مندوبین کا واک آؤٹ

آذربائیجان کے دارالحکومت باکو میں منعقدہ ایشیائی ممالک کی تنظیم سیکا (CICA – Conference on Interaction and Confidence Building Measures in Asia) کے سربراہی اجلاس کے دوران 10 سے زائد ممالک کے مندوبین نے اسرائیلی صدر آئزک ہرزوگ (Isaac Herzog) کے خطاب کے وقت احتجاجاً ہال سے واک آؤٹ کیا۔

عالمی میڈیا اور مرکزِ اطلاعاتِ فلسطین کے مطابق، جیسے ہی اسرائیلی صدر نے اپنا خطاب شروع کیا، ترک وزیرِ خارجہ حاقان فیدان (Hakan Fidan) اور ان کا وفد فوری طور پر اپنی نشستوں سے اٹھے اور ہال کا بائیکاٹ کرتے ہوئے باہر نکل گئے۔ ان کے ساتھ دیگر متعدد ایشیائی ممالک کے نمائندوں نے بھی غزہ پر جاری اسرائیلی جارحیت اور خونریز جنگ کے خلاف شدید سیاسی ردِعمل دیتے ہوئے اجلاس کا بائیکاٹ کیا۔

واضح رہے کہ سیکا (CICA) کا یہ سربراہی اجلاس آذربائیجان کی صدارت میں منعقد ہو رہا ہے۔ 28 رکن ممالک پر مشتمل یہ تنظیم ایشیائی ریاستوں کے 90 فیصد رقبے اور دنیا کی نصف سے زائد آبادی کی نمائندگی کرتی ہے۔ عالمی فورم پر یہ احتجاج اور بائیکاٹ ایسے وقت میں سامنے آیا ہے جب بین الاقوامی سطح پر عالمی عدالتِ انصاف (ICJ) اور بین الاقوامی فوجداری عدالت (ICC) کے سامنے غزہ میں جاری مظالم پر اسرائیل پر سیاسی اور قانونی دباؤ میں مسلسل اضافہ ہو رہا ہے۔