چینی روبوٹ نے انسانی مداخلت کے بغیر پیچیدہ سرجری انجام دے دی

چینی کمپنی کے تیار کردہ ایک جدید روبوٹ نے مصنوعی ذہانت کی مدد سے براہ راست انسانی مداخلت کے بغیر 30 کلوگرام وزنی سور پر بائلیری سرجری کامیابی سے انجام دے دی، جسے روبوٹک میڈیکل ٹیکنالوجی میں ایک اہم پیشرفت قرار دیا جا رہا ہے۔

کمپنی کے مطابق سرجری کے بنیادی مراحل روبوٹ نے خودمختار طور پر مکمل کیے۔ پہلی ہی کوشش میں روبوٹ نے آپریشن کے 88 فیصد مراحل کامیابی سے انجام دیے، جبکہ باقی مراحل کے دوران اس نے فوری طور پر خود کو ایڈجسٹ کرتے ہوئے طریقۂ کار میں ضروری تبدیلیاں کیں اور سرجری مکمل کر لی۔

کمپنی کا کہنا ہے کہ روبوٹ کا دماغ نیورون اے آئی ماڈل پر مبنی ہے، جو ایک ملٹی موڈل ایکشن جنریشن سسٹم ہے۔ اس ماڈل کو 3 ارب پیرا میٹرز پر تربیت دی گئی ہے، جس میں 23 ہزار سرجیکل ویڈیو کلپس شامل ہیں۔ اس تربیت کی بدولت روبوٹ تجربہ کار سرجنز کے کلینیکل فیصلوں کی نقل کرنے اور آپریشن کے دوران تصاویر اور آلات کی حالت کے مطابق حکمتِ عملی بنانے کی صلاحیت رکھتا ہے۔

رپورٹ کے مطابق یہ تجربہ دنیا میں اپنی نوعیت کا پہلا مظاہرہ ہے، جو انسانی کنٹرول کے تحت ریموٹ ٹیلی آپریشن سے مکمل طور پر خودمختار روبوٹک سرجری کی جانب ایک نمایاں قدم سمجھا جا رہا ہے۔ تاہم کمپنی نے واضح کیا ہے کہ یہ سرجری مکمل طور پر انسانی سرجنز کی نگرانی میں کی گئی، جو کسی بھی وقت کنٹرول سنبھال سکتے تھے۔

کمپنی نے مزید وضاحت کی کہ یہ مظاہرہ انسانوں میں اس نظام کی حفاظت یا مؤثر ہونے کا براہِ راست ثبوت نہیں اور نہ ہی اسے فوری طور پر انسانی سرجری پر لاگو کیا جا سکتا ہے، تاہم مستقبل میں طبی شعبے میں اس ٹیکنالوجی کے امکانات روشن دکھائی دیتے ہیں۔