پاک بھارت جنگ سے شہرت پانے والے چینی 10سی طیاروں کاایئرشومیں شاندارمظاہرہ

پاک بھارت جنگ کے دوران دنیابھرکی توجہ کا مرکزبننے والے جدید چینی لڑاکا طیارے جے 10سی نے سنگاپورایئرشومیں شاندارمظاہرہ پیش کیا۔یہ طیارہ عالمی سطح پر اس وقت نمایاں ہوا جب گزشتہ سال مئی میں پاک فضائیہ نے  اس طیارے کو بھارت کے زیر استعمال فرانسیسی ساختہ رافیل لڑاکا طیارے کو مار گرانے کے لیے استعمال کیا تھا۔

سنگاپور میں ہونے والے ائیر شو میں چینی فضائیہ کی ٹیم کے 6 جے 10 سی طیاروں نے مشترکہ فضائی مظاہرہ پیش کیا جبکہ دو طیاروں نے انفرادی طور پر کرتب دکھائے۔

جے-10 سی ایک سنگل انجن، ملٹی رول جنگی طیارہ ہے جسے چین کی چینگدو ائیرکرافٹ کارپوریشن نے تیار کیا ہے۔یہ طیارہ جدید انجن اور ایکٹیو الیکٹرانکلی اسکینڈ ایریے ریڈار سے لیس ہے جبکہ اس میں پی ایل-10 اور پی ایل-15 ائیر ٹو ائیر میزائل نصب کیے جاسکتے ہیں۔

چینی میڈیا کے مطابق پاکستان اس وقت چین کے علاوہ واحد ملک ہے جو جے-10 سی طیارے استعمال کر رہا ہے اور پاکستان کے پاس اس طیارے کے 36 برآمدی ماڈلز کے ساتھ تقریباً 250 پی ایل-15 میزائل موجود ہیں۔گزشتہ سال مئی میں بھارت کے ساتھ چار روزہ سرحدی جنگ کے دوران پاکستان نے  ان طیاروں کی مددسے متعدد بھارتی لڑاکا طیارے مار گرائے تھے جن میں فرانسیسی ساختہ رافیل طیارے بھی شامل تھے۔