ایران سے تیل خریداری، چین نے 5 کمپنیوں پرعائد امریکی پابندیاں مسترد کردیں

چین کی وزارتِ تجارت کی جانب سے جاری بیان میں کہاگیاہے کہ  ایران سے سستے داموں پیٹرول خریدنے پر 5 کمپنیوں پر عائد امریکی پابندیوں کی تعمیل نہیں کریں گے۔

بیان میں امریکی پابندیوں کو تنقید کا نشانہ بناتے ہوئے کہا گیا کہ یہ پابندیاں چینی کمپنیوں کو دیگر ممالک کے ساتھ معمول کی اقتصادی، تجارتی اور متعلقہ سرگرمیاں انجام دینے سے غیر منصفانہ طور پر روکتی یا محدود کرتی ہیں۔

چینی وزارت تجارت کے مطابق ایران سے تیل خریدنے کے الزام میں چینی کمپنیوں پر عائد امریکی پابندیاں بین الاقوامی قانون اور بین الاقوامی تعلقات کے بنیادی اصولوں کی خلاف ورزی ہیں۔

بیان میں مزید کہا گیا ہے کہ چینی حکومت ہمیشہ ان یکطرفہ پابندیوں کی مخالفت کرتی آئی ہے جو اقوامِ متحدہ کی منظوری کے بغیر اور بین الاقوامی قانون کی بنیاد پر نہیں لگائی جاتیں۔

امریکی پابندیوں کی شکار 5 چینی کمپنیوں میں سے 3 صوبہ شینڈونگ میں اور دو دیگر صوبوں میں ہیں جن میں ہینگلی پیٹروکیمیکل ریفائنری اور ہیبے ژنہائی کیمیکل گروپ شامل ہیں۔

چین چھوٹی اور آزاد ریفائنریوں کے ذریعے ایرانی تیل کا ایک بڑا خریدار ہے۔ یہ ریفائنریاں کم قیمت پر فروخت ہونے والے ایرانی خام تیل پر انحصار کرتی ہیں۔