اسحاق ڈار کا دورہ اہم، ایران سمیت علاقائی امور پر یکساں مؤقف رکھتے ہیں: چین

بیجنگ: چینی وزارتِ خارجہ نے پاکستان کے نائب وزیراعظم اور وزیرِ خارجہ اسحاق ڈار کے دورہِ چین کو خطے کی موجودہ صورتحال میں ‘انتہائی اہم’ قرار دیتے ہوئے واضح کیا ہے کہ پاکستان اور چین، ایران سمیت تمام علاقائی امور پر یکساں مؤقف رکھتے ہیں۔ بیجنگ میں جاری کردہ بیان میں کہا گیا ہے کہ دونوں ممالک مشرقِ وسطیٰ میں جاری جنگ کو روکنے اور پائیدار امن کے فروغ کے لیے مکمل ہم آہنگی کے ساتھ کام کر رہے ہیں۔

چینی وزارتِ خارجہ کی ترجمان ماؤننگ نے پاکستان کی جانب سے کشیدگی کم کرنے کے لیے کی جانے والی سفارتی کوششوں اور ثالثی کے کردار کو سراہتے ہوئے کہا کہ چین اس مشن میں پاکستان کے ساتھ کھڑا ہے۔ بیان میں مزید انکشاف کیا گیا کہ چین کے تین بحری جہاز آبنائے ہرمز سے بحفاظت گزر چکے ہیں، جس پر چینی حکام نے ایرانی تعاون کا شکریہ ادا کیا۔

چین نے امریکہ اور اسرائیل سے مطالبہ کیا ہے کہ وہ فوری طور پر فوجی کارروائیاں بند کریں۔ اعلامیے میں واٹر پلانٹس اور جوہری ری ایکٹرز پر حملوں کی سخت الفاظ میں مذمت کرتے ہوئے کہا گیا کہ جوہری تنصیبات کو نشانہ بنانا کسی صورت قابلِ قبول نہیں ہے۔ چین نے تمام فریقین سے تحمل کا مظاہرہ کرنے کی اپیل کرتے ہوئے خطے میں امن کی بحالی کے لیے اپنے ‘تعمیری کردار’ کی پیش کش بھی کی ہے۔