چین کا مسئلہ فلسطین کے دو ریستی حل کی حمایت جاری رکھنے کا اعلان

چین نے مشرقِ وسطیٰ میں دیرپا امن کے قیام کے لیے مسئلہ فلسطین کے دو ریاستی حل (Two-State Solution) کی مسلسل اور بلا مشروط حمایت جاری رکھنے کا اعادہ کیا ہے۔

عالمی میڈیا کے مطابق چینی وزارتِ خارجہ کی جانب سے جاری کردہ بیان میں کہا گیا ہے کہ چینی وزیرِ خارجہ وانگ ای (Wang Yi) نے فلسطینی عوام کے جائز حقوق اور آزاد ریاست کے قیام کے لیے بیجنگ کی مکمل حمایت کا اظہار کیا ہے۔ انہوں نے اس بات کی تصدیق کی کہ چین بین الاقوامی فورمز پر فلسطین کے معاملے کی بااثر اور مؤثر وکالت جاری رکھے گا۔

آذربائیجان کے دارالحکومت باکو میں منعقدہ سیکا (CICA) اجلاس کے موقع پر اپنی فلسطینی ہم منصب فارسین آغابکیان شاہین (Varsen Aghabekian Shahin) سے ملاقات کے دوران وانگ ای نے زور دیا کہ موجودہ عالمی حالات میں فلسطین کے دیرینہ اور بنیادی مسئلے کو کسی صورت نظر انداز نہیں کیا جانا چاہیے۔ انہوں نے دنیا بھر کے تمام امن پسند ممالک اور عالمی برادری پر زور دیا کہ وہ خطے میں پائیدار امن کی خاطر دو ریاستی حل کی عملی حمایت اور کوششوں کو تیز کریں۔