پاکستانی طلبہ کیلئے چین میں ماسٹرز اور پی ایچ ڈی کی مکمل فنڈڈ اسکالرشپس کا اعلان

پاکستانی طلبہ کے لیے چین میں اعلیٰ تعلیم حاصل کرنے کا ایک اہم اور سنہری موقع فراہم کر دیا گیا ہے۔ چین کی جانب سے ماسٹرز اور پی ایچ ڈی پروگرامز کے لیے مکمل فنڈڈ اسکالرشپس کا اعلان کیا گیا ہے، جن کے تحت پاکستانی طلبہ مختلف تعلیمی شعبوں میں تعلیم حاصل کر سکیں گے۔

اسکالرشپ میں فری ٹیوشن فیس، رہائش، میڈیکل سہولیات اور ماہانہ وظیفہ شامل ہے، جس کے باعث طلبہ کو دورانِ تعلیم کسی مالی دباؤ کا سامنا نہیں کرنا پڑے گا۔ انجینئرنگ، سائنسز اور سوشل سائنسز سے تعلق رکھنے والے طلبہ اس اسکالرشپ کے لیے اہل قرار دیے گئے ہیں۔

درخواستوں کا عمل ہائر ایجوکیشن کمیشن (ایچ ای سی) کے ذریعے مکمل کیا جائے گا، جبکہ اسکالرشپ کے لیے درخواست جمع کرانے کی آخری تاریخ 18 جنوری 2026 مقرر کی گئی ہے۔ اہل امیدواروں کو ہدایت کی گئی ہے کہ وہ مقررہ وقت کے اندر اپنی درخواستیں مکمل کر کے جمع کروائیں۔