چین کی بڑی شپنگ کمپنی کوسکو کے دو جہاز آبنائے ہرمز سے گزرنے میں کامیاب

عالمی جہاز رانی کے سب سے اہم راستے آبنائے ہرمز میں جاری تعطل کے دوران چین کی معروف شپنگ کمپنی ‘کوسکو’ کے دو کنٹینر بردار جہاز کامیابی سے گزر گئے ہیں۔ شپ ٹریکنگ ڈیٹا کے مطابق، یہ جہاز ملائیشیا کی جانب گامزن ہیں، جنہوں نے گزشتہ جمعہ کو ایرانی شرائط کی وجہ سے اپنا راستہ تبدیل کر لیا تھا، تاہم اب وہ ایران کی منظوری کے بعد آبی گزرگاہ عبور کر چکے ہیں۔

ایرانی حکام نے واضح کر دیا ہے کہ اب آبنائے ہرمز سے کوئی بھی جہاز ایران کی باقاعدہ منظوری اور دستاویزات کی جانچ پڑتال کے بغیر نہیں گزر سکتا۔ ایرانی پارلیمنٹ کی حالیہ قانون سازی کے تحت ‘آزادانہ گزرگاہ’ کا حق ختم کر کے ایک نیا ‘ٹول سسٹم’ متعارف کرایا گیا ہے۔ حکام کا کہنا ہے کہ صرف ان جہازوں کو راستہ دیا جا رہا ہے جو ایران کے سکیورٹی قوانین پر پورا اترتے ہوں اور جن کا تعلق ‘دشمن ریاستوں’ سے نہ ہو۔

اس وقت صورتحال یہ ہے کہ دنیا بھر کی تجارت اور توانائی کی فراہمی شدید متاثر ہو رہی ہے، کیونکہ سینکڑوں بحری جہاز آبنائے ہرمز کے دہانے پر کھڑے ایران کے جواب اور اجازت ناموں کا انتظار کر رہے ہیں۔ ماہرین کا خیال ہے کہ چین کے جہازوں کو ملنے والی رعایت بیجنگ اور تہران کے قریبی تزویراتی تعلقات کا نتیجہ ہو سکتی ہے، جبکہ دیگر ممالک کے لیے یہ آبی راستہ تاحال ایک معمہ بنا ہوا ہے۔