وزیراعلیٰ سندھ کا ورلڈ بینک کے ترقیاتی منصوبوں پر تفصیلی جائزہ اجلاس

 اجلاس میں ورلڈ بینک کی کنٹری ڈائریکٹر مس بولورما امگابازار کی قیادت میں 10 رکنی وفد نے صوبے میں مختلف شعبوں کی پیش رفت پر بریفنگ دی۔ اجلاس میں صوبائی وزرا، مشیر، چیف سیکریٹری، میئر کراچی، متعلقہ سیکریٹریز اور دیگر افسران بھی شریک ہوئے۔

وزیراعلیٰ سندھ نے کہا کہ ورلڈ بینک کے ساتھ شراکت داری سندھ کے اصلاحاتی اور بحالی ایجنڈے میں اہم حیثیت رکھتی ہے اور بین الاقوامی شراکت داری صوبے کی ترقی و بحالی میں کلیدی کردار ادا کرتی ہے۔سندھ میں ورلڈ بینک کے 13 منصوبے جاری ہیں جن کی کل لاگت 3.86 ارب ڈالر ہے، جن میں سے 1.96 ارب ڈالر خرچ ہو چکے ہیں۔ اجلاس میں مالی سال 2026 کے لیے 700.25 ملین ڈالر جاری کرنے کا فیصلہ کیا گیا۔اجلاس میں کراچی کے شہری ترقی، ٹرانسپورٹ، بلدیاتی منصوبوں اور پراپرٹی سروے کی پیش رفت کا بھی جائزہ لیا گیا۔ وزیراعلیٰ سندھ نے کہا کہ پراپرٹی سروے کے مکمل ہونے سے بلدیاتی اداروں کی آمدن میں اضافہ ہوگا۔ ایس باس (SBOSS) کے تحت 13 ادارے آن بورڈ ہیں اور 4 ہزار سے زائد ای-پرمٹس جاری کی جا چکی ہیں، جبکہ فیز تھری میں مزید ادارے مئی 2026 تک شامل ہوں گے۔پانی، نکاسی آب اور آبپاشی کے منصوبوں کو عوامی صحت اور ماحولیاتی تحفظ کے لیے ناگزیر قرار دیا گیا۔ اجلاس میں کراچی واٹر اینڈ سیوریج پروجیکٹس، سندھ بیراجز، سیلاب متاثرین کے لیے بحالی منصوبوں اور تعلیم، صحت، سماجی تحفظ، زراعت اور ماحولیاتی بحالی کے منصوبوں پر بھی تفصیلی بریفنگ دی گئی۔وزیراعلیٰ سندھ نے تمام محکموں کو ہدایت کی کہ رکاوٹیں دور کی جائیں اور خریداری و فنڈز کے اجرا میں تیزی لائی جائے تاکہ عوامی زندگی میں بہتری لائی جا سکے۔