قادر آباد بیراج پر اونچے درجے کا سیلاب، چناب میں پانی کا بہاؤ بڑھ گیا

دریائے چناب میں پانی کے بہاؤ میں مسلسل اضافے کے باعث مختلف بیراجوں پر سیلابی صورتحال پیدا ہو گئی ہے۔ محکمہ انہار کی جانب سے جاری کردہ تازہ ترین اعداد و شمار کے مطابق قادر آباد بیراج کے مقام پر اونچے درجے کا سیلاب ریکارڈ کیا گیا ہے، جبکہ مرالہ اور خانکی بیراج پر درمیانے درجے کا سیلاب ہے۔

محکمہ انہار کی رپورٹ کے مطابق مختلف ہیڈ ورکس پر پانی کی آمد و اخراج کی صورتحال درج ذیل ہے  قادر آباد بیراج  اونچے درجے کا سیلاب,  پانی کی آمد 2 لاکھ 45 ہزار 234 کیوسک جبکہ اخراج 2 لاکھ 41 ہزار 415 کیوسک ریکارڈ کیا گیا۔ ہیڈ مرالہ درمیانے درجے کا سیلاب,  پانی کی آمد 1 لاکھ 95 ہزار 856 کیوسک جبکہ اخراج 1 لاکھ 60 ہزار 108 کیوسک ریکارڈ کیا گیا۔ مرالہ کے مقام پر پانی کے بہاؤ میں مسلسل اضافہ ہو رہا ہے۔ خانکی بیراج  نچلے سے درمیانے درجے کا سیلاب,  پانی کی آمد 1 لاکھ 65 ہزار 438 کیوسک جبکہ اخراج 1 لاکھ 60 ہزار 108 کیوسک ریکارڈ کیا گیا۔

محکمہ انہار اور انتظامیہ نے دریا کے نزدیکی علاقوں اور بستیوں کو الرٹ جاری کرتے ہوئے تمام تر ممکنہ حفاظتی تدابیر اختیار کرنے کی ہدایت کی ہے۔