چیٹ جی پی ٹی اب اپ لوڈ فائلز یاد رکھے گا، صارفین کیلئے نیا فیچر متعارف

مصنوعی ذہانت پر مبنی مقبول چیٹ بوٹ چیٹ جی پی ٹی میں ایک نیا فیچر متعارف کرا دیا گیا ہے، جس کے بعد صارفین کی اپ لوڈ کی گئی فائلز محفوظ رہ سکیں گی اور مستقبل کی چیٹس میں دوبارہ استعمال ہو سکیں گی۔

OpenAI کی جانب سے متعارف کرائے گئے اس نئے فیچر کے تحت اپ لوڈ کی گئی فائلز ایک مخصوص لائبریری میں محفوظ ہوں گی، جہاں سے صارفین بعد میں بھی ان تک رسائی حاصل کر سکیں گے۔

اس سہولت کے تحت اسپریڈ شیٹس، پریزنٹیشنز، دستاویزات اور دیگر فائلز کو محفوظ کیا جا سکے گا، جبکہ چیٹ جی پی ٹی ان فائلز کو آئندہ گفتگو میں بھی استعمال کر سکے گا۔

رپورٹ کے مطابق یہ نیا نظام کسی مصنوعی ذہانت ورک اسپیس کی طرح کام کرے گا، جہاں پرانی فائلز کو دوبارہ استعمال کیا جا سکے گا۔

کمپنی نے مختلف سبسکرپشن پلانز کے لیے اسٹوریج کی الگ حد مقرر کی ہے۔ مفت صارفین کو 500 ایم بی، گو صارفین کو 4 جی بی، پلس اور بزنس صارفین کو 20 جی بی جبکہ پرو صارفین کو 100 جی بی اسٹوریج فراہم کی جائے گی۔

یہ فیچر موبائل ایپ اور ویب انٹرفیس دونوں پر دستیاب ہوگا، جبکہ لائبریری مینیو کے ذریعے اپ لوڈ کی گئی فائلز دیکھی جا سکیں گی۔