دشمن کے ساتھ سیز فائر ہوا آپس کا تناؤ ختم نہیں ہوا،بیرسٹر گوہر

چیئرمین پاکستان تحریک انصاف بیرسٹر گوہر نے کہا ہے کہ تحریک اپنی جگہ لیکن مذاکرات بھی ہونے چاہئیں، تاہم حالات جیسے تقاضے کر رہے ہیں ویسے مذاکرات نہیں ہو رہے۔

داہگل ناکے پر میڈیا سے گفتگو کرتے ہوئے بیرسٹر گوہر کا کہنا تھا کہ وہ ہر منگل یہاں آتے ہیں لیکن افسوس کے ساتھ ملاقات کی اجازت نہیں دی جاتی۔ انہوں نے کہا کہ حالات بدلنے کے لیے ملاقات کی بھیک مانگنی پڑ رہی ہے، 2025 گزر گیا ہے اب حالات بدلنے چاہئیں۔

چیئرمین پی ٹی آئی نے صاحبِ اقتدار سے اپیل کی کہ حالات کی نوعیت کو مدنظر رکھتے ہوئے دل بڑا کریں۔ ان کا کہنا تھا کہ عدالتی احکامات ایس او پیز کے تحت کیے جا رہے ہیں، کوئی ایسا طریقہ نکالا جائے جس سے حالات بہتر ہو سکیں۔

بیرسٹر گوہر نے کہا کہ رواں سال بانی پی ٹی آئی اور بشریٰ بی بی کو دو سزائیں سنائی گئیں، افسوس کے ساتھ 2026 میں داخل ہو رہے ہیں اور ایسا لگتا ہے کہ یہ سال بھی سزاؤں کا سال ہوگا۔