لاہور کینٹ کچہری سے ملزمان فرار معاملہ: انسپکٹر سمیت 9 اہلکاروں کے خلاف مقدمہ درج

صوبائی دارالحکومت میں کینٹ کچہری سے چار ملزمان کے فرار ہونے کے سنگین واقعے پر ڈی آئی جی آپریشنز کے حکم پر بڑی کارروائی کرتے ہوئے انسپکٹر سمیت 9 پولیس اہلکاروں کے خلاف مقدمہ درج کر لیا گیا ہے۔ پولیس ترجمان کے مطابق، تھانہ شمالی چھاؤنی میں درج کیے گئے اس مقدمے میں سپرویژن آفیسر انسپکٹر عامر، محرر فلک شیر، ایک ہیڈ کانسٹیبل اور 6 کانسٹیبلز کو نامزد کیا گیا ہے۔ پولیس نے مقدمہ درج کرنے کے فوراً بعد غفلت کا مظاہرہ کرنے والے تمام متعلقہ اہلکاروں کو گرفتار کر کے ان کے خلاف باقاعدہ تفتیش کا آغاز کر دیا ہے۔

دوسری جانب، پولیس نے فوری کارروائی کرتے ہوئے کچہری سے فرار ہونے والے چار ملزمان میں سے ایک کو دوبارہ گرفتار کر لیا ہے، جبکہ باقی تین مفرور ملزمان کا سراغ لگانے کے لیے مختلف مقامات پر چھاپے مارے جا رہے ہیں۔ پولیس حکام کا کہنا ہے کہ مفرور ملزمان کو جلد ہی دوبارہ قانون کی گرفت میں لے لیا جائے گا اور فرائض میں مجرمانہ غفلت اور لاپرواہی برتنے والے پولیس اہلکاروں کے خلاف سخت قانونی کارروائی جاری رہے گی۔