کال سینٹرز جرائم کا گڑھ بن چکے، 60 ملین ڈالر کے فراڈ کئے گئے: وزیر داخلہ سندھ

وزیر داخلہ سندھ ضیاء الحسن لنجار نے کہا ہے کہ کراچی میں کال سینٹرز جرائم کا مرکز بن چکے ہیں اور ان کے ذریعے بین الاقوامی سطح پر بڑے پیمانے پر فراڈ کیا جا رہا تھا۔

کراچی میں پریس کانفرنس کے دوران انہوں نے بتایا کہ نیشنل سائبر کرائم انویسٹی گیشن ایجنسی (این سی سی آئی اے) نے انٹیلی جنس بنیادوں پر 18 دسمبر کو ڈی ایچ اے فیز 6 میں ایک غیر قانونی کال سینٹر پر چھاپہ مارا۔ کارروائی کے دوران 15 غیر ملکی اور 19 پاکستانی شہری گرفتار کیے گئے، جن میں دو خواتین بھی شامل ہیں۔

ضیاء الحسن لنجار کے مطابق گرفتار ملزمان کال سینٹر کے ذریعے بیرونِ ملک افراد کو سرمایہ کاری کے نام پر منافع کا جھانسہ دے کر لوٹ رہے تھے۔ ابتدائی تحقیقات کے مطابق تقریباً 60 ملین ڈالر کی ٹرانزیکشنز کی گئی، جو بٹ کوائن اور امریکی ڈالرز میں منتقل کی جاتی تھیں۔ کارروائی کے دوران 37 کمپیوٹرز، 40 موبائل فونز اور 10 ہزار سے زائد سمز برآمد کی گئیں۔

صوبائی وزیر داخلہ نے کہا کہ سندھ حکومت غیر قانونی کال سینٹرز کے خلاف کریک ڈاؤن جاری رکھے ہوئے ہے اور کسی کو قانون ہاتھ میں لینے کی اجازت نہیں دی جائے گی۔ انہوں نے کہا کہ تحقیقات میں ان کیسز کے تمام پہلوؤں کو مدنظر رکھا جا رہا ہے، اور دو یا تین شہریت رکھنے والے غیر ملکی بھی کال سینٹر میں کام کر رہے تھے۔

این سی سی آئی اے کے ایڈیشنل ڈائریکٹر طارق نواز نے بتایا کہ گرفتاریاں ڈی ایچ اے فیز 1 اور 6 سے عمل میں آئیں، تمام پہلوؤں سے تحقیقات جاری ہیں اور ادارے میں اندرونی احتساب بھی بڑھایا جا رہا ہے۔ انہوں نے کہا کہ کرائم کی کوئی سرحد نہیں، ملکی یا غیر ملکی کوئی بھی ملوث ہو سکتا ہے اور ٹیلی گرام ایپ کے ذریعے فراڈ کیا جا رہا تھا۔