کابینہ کمیٹی اجلاس: ڈسکوز فیسکو، گیپکو اور آئیسکو کی تنظیم نو کے منصوبے کی منظوری

نائب وزیراعظم و وزیر خارجہ اسحاق ڈار کی زیر صدارت کابینہ کمیٹی برائے نجکاری (CCoP) کا اجلاس ہوا، جس میں نجکاری کے پہلے مرحلے میں شامل بجلی کی تقسیم کار کمپنیوں (DISCOs) فیسکو، گیپکو اور آئیسکو کی تنظیم نو (Restructuring Plan) کے منصوبے کی منظوری دے دی گئی ہے۔ اجلاس میں فیصلہ کیا گیا ہے کہ ان کمپنیوں کے تمام زمین اور لینڈ اثاثے ایک نئی سرکاری ملکیتی پاور ہولڈنگ کمپنی کو منتقل کیے جائیں گے، جسے ‘اسکیم آف ارینجمنٹ’ کے تحت نافذ کرنے اور حتمی منظوری کے لیے ایس ای سی پی (SECP) کو جمع کرایا جائے گا۔

نائب وزیراعظم اسحاق ڈار نے متعلقہ حکام کو منصوبے پر تیز رفتاری سے عملدرآمد یقینی بنانے کی ہدایت کرتے ہوئے کہا کہ اس اقدام سے بجلی کی تقسیم کے شعبے میں گردشی قرضوں اور لائن لاسز (نقصانات) کو کم کرنے میں مدد ملے گی جبکہ صارفین کو خدمات کی فراہمی میں بہتری آئے گی۔ اجلاس میں وفاقی وزیر توانائی سردار اویس احمد خان لغاری، وزیر خزانہ محمد اورنگزیب اور مشیرِ نجکاری محمد علی سمیت دیگر اعلیٰ حکام نے شرکت کی۔