بشریٰ بی بی بھی اڈیالہ جیل میں قیدِ تنہائی میں ہیں، 8 ہفتوں سے ملاقات کی اجازت نہیں: بہن کا دعویٰ

اسلام آباد: سابق وزیر اعظم عمران خان کی اہلیہ بشریٰ بی بی کی ہمشیرہ مریم ریاض وٹو نے یہ دعویٰ کیا ہے کہ بشریٰ بی بی کو بھی اڈیالہ جیل میں قیدِ تنہائی (Solitary Confinement) میں رکھا گیا ہے۔

مریم ریاض وٹو نے سماجی رابطے کی ویب سائٹ ‘ایکس’ پر جاری کیے گئے اپنے بیان میں کہا ہے کہ بشریٰ بی بی کو جیل میں 8 ہفتوں سے زائد کا عرصہ گزر چکا ہے، مگر اس تمام عرصے کے دوران اہل خانہ اور وکلا کو ان سے ملاقات کی اجازت نہیں دی جا رہی ہے۔ انہوں نے اپنے پیغام میں سوال اٹھایا کہ “کیا مجھے اڈیالہ جیل کے باہر احتجاج کرنے والوں کو یہ یاد دلانے کی ضرورت ہے کہ بشریٰ بی بی کو بھی جیل میں قیدِ تنہائی کا سامنا ہے؟”

مریم ریاض وٹو نے ایک اور پیغام میں یہ بھی دعویٰ کیا کہ موجودہ حالات کے تناظر میں بشریٰ بی بی اور پاکستان تحریک انصاف کے بانی عمران خان کے خلاف 9 مئی کے واقعات کو جواز بنا کر من گھڑت مقدمات چلائے جا رہے ہیں۔