بجٹ میں نئے ٹیکس اقدامات، متعدد روزمرہ اشیاء مہنگی ہونے کا امکان

اسلام آباد: آئندہ مالی سال کے وفاقی بجٹ میں جنرل سیلز ٹیکس کے نفاذ کے بعد روزمرہ استعمال کی متعدد اشیاء کی قیمتوں میں نمایاں اضافہ متوقع ہے۔

فنانس بل کے مطابق مختلف اشیاء کو تھرڈ شیڈول میں شامل کیا جا رہا ہے جس کے ذریعے حکومت کو تقریباً 70 ارب روپے کی اضافی آمدن حاصل ہوگی۔

مجوزہ تبدیلیوں کے تحت دودھ، ڈیری مصنوعات، مٹھائیاں، جام، جیلی، کیچپ، مصالحہ جات، خوردنی تیل، گھی، کراکری، ہیئر آئل، شیمپو، جوتے، پرفیوم، باڈی اسپرے، بیکری مصنوعات اور پلاسٹک کی گھریلو اشیاء سمیت سینیٹری مصنوعات بھی مہنگی ہو جائیں گی۔

اسی طرح سوٹ کیس، کیمرے، کچن ویئر، سفری بیگ، ای سگریٹ، زرعی ادویات اور جراثیم کش مصنوعات پر بھی ٹیکس کے نفاذ سے قیمتوں میں اضافہ ہوگا۔

حکومتی ذرائع کے مطابق اس اقدام کا مقصد ٹیکس نیٹ کو وسعت دینا اور محصولات میں اضافہ کرنا ہے، تاہم اس کے نتیجے میں عام صارفین پر مہنگائی کا بوجھ بڑھنے کا امکان ہے۔