خیبرپختونخوا حکومت کا بی آر ٹی پشاور کے روٹ میں توسیع کا فیصلہ، ضلع خیبر تک سروس بڑھانے کی ہدایت

خیبرپختونخوا حکومت نے ماحولیاتی آلودگی میں کمی، ٹریفک دباؤ پر قابو پانے اور عوام کو بہتر سفری سہولت فراہم کرنے کے لیے بی آر ٹی پشاور کے روٹ کو مزید توسیع دینے کا فیصلہ کر لیا ہے۔

وزیراعلیٰ خیبرپختونخوا محمد سہیل آفریدی نے بی آر ٹی سروس کو ضلع خیبر کے علاقوں جمرود، ٹیڈی اور باڑہ بازار تک بڑھانے کے لیے کم سے کم وقت میں تمام ضروری ہوم ورک مکمل کرنے کی ہدایت جاری کر دی ہے۔

 وزیراعلیٰ کا کہنا تھا کہ بی آر ٹی کی توسیع سے پشاور اور ضلع خیبر کے درمیان آمد و رفت مزید آسان ہو جائے گی، جبکہ خیبر کے عوام کو محفوظ، معیاری اور سستی سفری سہولت میسر آئے گی۔

انہوں نے واضح کیا کہ بی آر ٹی روٹ میں توسیع سے نہ صرف ٹریفک دباؤ میں کمی آئے گی بلکہ ماحولیاتی آلودگی پر قابو پانے میں بھی مدد ملے گی۔

اجلاس کے دوران بی آر ٹی سروس کے لیے کارخانوں اسٹیشن پر 50 کروڑ روپے کی لاگت سے ریمپ کی تعمیر کا بھی فیصلہ کیا گیا، جس سے مسافروں کو مزید سہولت فراہم کی جا سکے گی۔