برطانوی نژاد پاکستانی نوجوانوں کا مکہ سے مدینہ تک تاریخی سائیکل ، سوشل میڈیا پر خوب پذیرائی

 تین برطانوی نژاد پاکستانی بھائیوں نے عزم و حوصلے کی مثال قائم کرتے ہوئے مکہ المکرمہ سے مدینہ منورہ تک کا مقدس سفر سائیکل پر کامیابی سے مکمل کر لیا۔

یہ منفرد سفر صرف جسمانی طاقت کا امتحان نہیں تھا، بلکہ صبر، شکر اور عشقِ رسول ﷺ کی عملی تصویر بھی تھا۔ تینوں نوجوان ارشد محمود کے بیٹے ہیں، جو ہیلی فیکس کے سابق میئر ہیں۔

طویل فاصلے، شدید گرمی اور جسمانی تھکن کے باوجود ان کا ایمان اور مدینہ منورہ پہنچنے کی خواہش ان کے حوصلے کو تازہ رکھتی رہی۔ راستے میں مقامی لوگوں نے انہیں پرتپاک استقبال اور خراج تحسین پیش کیا۔

مدینہ منورہ پہنچنے پر نوجوانوں نے روضۂ رسول ﷺ پر حاضری دی اور امتِ مسلمہ، بالخصوص پاکستان اور برطانیہ میں مقیم مسلمانوں کے لیے خصوصی دعائیں کیں۔

ان کا کہنا تھا کہ یہ سفر جسمانی مہم کے ساتھ ایک روحانی تجربہ بھی تھا اور ان کی زندگی کا یادگار ترین باب بن گیا۔
یہ کارنامہ دنیا بھر کے نوجوانوں کے لیے پیغام ہے کہ خالص نیت اور بلند مقصد کے ساتھ ناممکن بھی ممکن بنایا جا سکتا ہے۔

سوشل میڈیا اور مختلف حلقوں کی جانب سے ان کے جذبے کو خوب سراہا جا رہا ہے۔