برطانوی ہائی کمشنر جین میریئٹ کا این ڈی ایم اے ہیڈکوارٹرز اور این ای او سی کا دورہ

اسلام آباد: برطانیہ کی ہائی کمشنر جین میریئٹ نے این ڈی ایم اے ہیڈکوارٹرز کا دورہ کیا اور نیشنل ایمرجنسیز آپریشن سینٹر (این ای او سی) کا معائنہ کیا۔ اس موقع پر چیئرمین این ڈی ایم اے لیفٹیننٹ جنرل انعام حیدر ملک سے ان کی ملاقات بھی ہوئی۔

برطانوی ہائی کمشنر کو پاکستان میں آفات سے نمٹنے کے لیے پیشگی تیاری، آگاہی کے نظام اور نیشنل ایمرجنسیز آپریشن سینٹر کی تکنیکی صلاحیتوں کے بارے میں تفصیلی بریفنگ دی گئی۔ انہیں این ڈی ایم اے کے ڈیجیٹل پورٹلز، موبائل ایپلیکیشن اور ٹیکنالوجی پر مبنی اقدامات سے بھی آگاہ کیا گیا۔

چیئرمین این ڈی ایم اے نے قومی سطح پر آفات سے نمٹنے اور خطرات کے تدارک میں ادارے کے کردار پر بریفنگ دیتے ہوئے 2026 کے دوران پاکستان اور دیگر ممالک کو درپیش ممکنہ خطرات کے بارے میں بھی آگاہ کیا۔

اس موقع پر جین میریئٹ نے آفات سے نمٹنے کے لیے این ڈی ایم اے کے جدید اور مربوط نظام کو سراہتے ہوئے کہا کہ نیشنل ایمرجنسیز آپریشن سینٹر دنیا کے بہترین ایمرجنسی سینٹرز میں سے ایک ہے۔ ملاقات میں پاکستان اور برطانیہ کے درمیان ڈیزاسٹر رسک ریڈکشن اور کلائمیٹ ریزیلینس کے شعبوں میں تعاون بڑھانے پر بھی تبادلہ خیال کیا گیا۔