برطانوی ہائی کمشنر جین میریٹ کا انٹرنیشنل ایجوکیشن سمٹ سے خطاب

برطانوی ہائی کمشنر جین میریٹ نے اسلام آباد میں منعقدہ انٹرنیشنل ایجوکیشن سمٹ سے خطاب کرتے ہوئے کہا ہے کہ آج اس سمٹ کا بنیادی مقصد تعلیم کی اہمیت کو اجاگر کرنا ہے، جبکہ اس ایونٹ میں تعلیم کے معیار (کوالٹی) پر بھی تفصیلی گفتگو کی جائے گی۔

برطانوی ہائی کمشنر نے کہا کہ عالمی سطح پر ریسرچ اور ڈویلپمنٹ کو غیر معمولی اہمیت دی جا رہی ہے، کیونکہ ترقی یافتہ معاشروں کی بنیاد مضبوط تحقیق پر ہوتی ہے۔ انہوں نے کہا کہ خطے کو تعلیم کے ساتھ ساتھ صحت اور موسمیاتی تبدیلی کے اثرات جیسے سنگین مسائل کا بھی سامنا ہے، جن سے نمٹنے کے لیے مشترکہ کوششیں ناگزیر ہیں۔جین میریٹ کا کہنا تھا کہ ریسرچ کے شعبے میں برطانیہ اور پاکستان کے درمیان تعاون کافی پرانا اور مضبوط ہے، جو دونوں ممالک کے تعلیمی اداروں کے لیے فائدہ مند ثابت ہو رہا ہے۔ انہوں نے زور دیا کہ ایجوکیشن ریفارمز ایک کمیونٹی آف پریکٹس ہے، جس کے لیے اجتماعی کاوشیں اور شراکت داری ضروری ہے۔انہوں نے مزید کہا کہ برطانیہ اور پاکستان کے مابین یونیورسٹیز کی سطح پر تعاون کا سلسلہ بھی جاری ہے، جس سے تعلیمی معیار کو بہتر بنانے میں مدد مل رہی ہے۔ پلاننگ اور فنانسنگ کے حوالے سے ریسرچرز کا وفاقی حکام کے ساتھ مل کر مشاورت کرنا بھی نہایت اہم ہے۔برطانوی ہائی کمشنر نے کہا کہ دنیا میں بے شمار ایسی مثالیں موجود ہیں جو یہ ثابت کرتی ہیں کہ مجموعی اور مشترکہ کوششوں کے ذریعے بڑی کامیابیاں حاصل کی جا سکتی ہیں۔