جناح انٹرنیشنل ایئرپورٹ پر تھائی ایئر کے بند دفتر سے لاش برآمد

جناح انٹرنیشنل ایئرپورٹ کے جناح ٹرمینل میں واقع غیر ملکی ایئرلائن تھائی ایئر کے بند دفتر سے ایک شخص کی لاش برآمد ہوئی ہے۔

ذرائع کے مطابق برآمد ہونے والی لاش تھائی ایئر کے اسٹیشن منیجر کی ہے، جو گزشتہ رات سے لاپتہ بتائے جا رہے تھے۔ لاش جناح ٹرمینل کی چوتھی منزل پر واقع ایئرلائن کے دفتر میں پائی گئی۔

واقعہ اس وقت سامنے آیا جب نجی ایئرلائن کے عملے نے آج شام اپنی پرواز کے وقت دفتر کھولا، تو اندر اسٹیشن منیجر کی لاش موجود تھی۔

اطلاع ملنے پر پولیس اور ایئرپورٹ سیکیورٹی حکام موقع پر پہنچ گئے، لاش کو تحویل میں لے کر قانونی کارروائی اور پوسٹ مارٹم کے لیے منتقل کر دیا گیا ہے۔

پولیس کے مطابق واقعے کی تمام پہلوؤں سے تحقیقات کی جا رہی ہیں جبکہ موت کی وجوہات جاننے کے لیے شواہد اکٹھے کیے جا رہے ہیں۔ مزید تفصیلات کا انتظار ہے۔