دہشت گردی اور تشدد جمہوریت کے عزم کو متزلزل نہیں کر سکتے: بلاول بھٹو

پاکستان پیپلز پارٹی (PPP) کے چیئرمین بلاول بھٹو زرداری نے سانحۂ کارساز کے شہداء کو عقیدت و احترام سے خراجِ تحسین پیش کرتے ہوئے کہا ہے کہ 18 اکتوبر پاکستان کی سیاسی و جمہوری تاریخ کا ایک سیاہ ترین اور الم ناک دن ہے۔

اپنے ایک خصوصی پیغام میں پی پی پی چیئرمین نے کہا کہ 18 اکتوبر 2007 کو جب ملک کی سابق وزیراعظم شہید محترمہ بینظیر بھٹو طویل جلاوطنی کے بعد وطن واپس لوٹیں، تو ان کے شاندار اور تاریخی استقبال کو بزدلانہ دہشت گردی کا نشانہ بنانے کی کوشش کی گئی۔ انہوں نے کہا کہ اس موقع پر پارٹی کے جیالوں اور جانباز کارکنوں نے اپنی جانوں کے نذرانے پیش کر کے اپنی قائد کی حفاظت کی اور جمہوریت و عوام کے حقِ حکمرانی سے اپنی غیر متزلزل وابستگی کا تاریخی ثبوت دیا۔

بلاول بھٹو زرداری کا مزید کہنا تھا کہ سانحۂ کارساز کے شہداء کا لہو اس بات کی گواہی دیتا ہے کہ دہشت گردی، انتہاپسندی اور تشدد جیسے ہتھکنڈے جمہوریت کے حوالے سے قوم کے عزم کو ہرگز متزلزل نہیں کر سکتے۔ انہوں نے اعادہ کیا کہ قائدِ عوام شہید ذوالفقار علی بھٹو اور شہید بینظیر بھٹو کا مشن آئین کی بالادستی، عوام کی حکمرانی، مساوات، سماجی انصاف اور ایک پُرامن و ترقی یافتہ پاکستان کی تعمیر ہے۔ پاکستان پیپلز پارٹی اپنے اس اصولی مشن پر کاربند رہتے ہوئے جمہوری اداروں کے استحکام اور عوام کے حقوق کے تحفظ کے لیے جدوجہد جاری رکھے گی۔