بلاول بھٹو سے پی پی رہنماؤں اور ارکان اسمبلی کی ملاقاتیں، مختلف امور پر بریفنگ

پاکستان پیپلز پارٹی (پی پی پی) کے چیئرمین بلاول بھٹو زرداری سے بلاول ہاؤس کراچی میں پارٹی رہنماؤں، اراکینِ پارلیمنٹ اور بلدیاتی نمائندوں نے تفصیلی ملاقاتیں کیں، جن میں قومی و صوبائی قانون سازی، شہری ترقی اور عوامی مسائل پر بات چیت کی گئی۔ ملاقات کرنے والوں میں قومی اسمبلی میں چیف وہپ اعجاز حسین جاکھرانی، فریال تالپور، اسپیکر سندھ اسمبلی سید اویس شاہ اور دیگر رہنما شامل تھے، جنہوں نے پارلیمانی و قانونی امور سے چیئرمین کو آگاہ کیا۔

ملاقات کے دوران میئر سکھر بیرسٹر ارسلان شیخ نے سکھر میں جاری ترقیاتی منصوبوں اور سکھر میونسپل کارپوریشن کی ڈیجیٹلائزیشن پر بریفنگ دی۔ انہوں نے شہر کے ایک لاکھ سے زائد گھرانوں کو صاف پانی کی فراہمی، گندے پانی کی ٹریٹمنٹ اور ایشیائی ترقیاتی بینک (ADB) کے کلائمیٹ ایڈاپٹیشن پروگرام میں پیش کیے گئے موسمیاتی منصوبوں سے متعلق بریفنگ دی۔ اس کے علاوہ وزیراعلیٰ سندھ کے معاونِ خصوصی جنید بلند، ایم این ایز مسرت رفیق مہیسر، صادق میمن اور اراکینِ اسمبلی فیاض بٹ، زبیر جونیجو اور ارباب برادران نے بھی اپنے اپنے علاقوں کے مسائل اور نچلی سطح پر جاری تنظیمی و فلاحی امور پر رپورٹ پیش کی۔