آزادکشمیر میں پیپلزپارٹی کی حکومت بنائیں گے: بلاول بھٹو کا دعویٰ

پاکستان پیپلز پارٹی (پی پی پی) کے چیئرمین بلاول بھٹو زرداری نے کوٹلی، آزاد کشمیر میں ایک بڑے جلسۂ عام سے خطاب کرتے ہوئے دعویٰ کیا ہے کہ ان کی جماعت آئندہ عام انتخابات میں بھرپور کامیابی حاصل کر کے آزاد کشمیر میں ایک بار پھر اپنی حکومت بنائے گی۔ انہوں نے کہا کہ پیپلز پارٹی گزشتہ چھ ماہ سے آزاد کشمیر میں حکومت کا حصہ رہ کر عوامی خدمت میں مصروفِ عمل ہے اور گزشتہ انتخابات کی طرح اس بار بھی کوٹلی کی تمام نشستوں پر جیالے کامیابی حاصل کریں گے۔ بلاول بھٹو نے کشمیری عوام سے اپنے گہرے تعلق کا اظہار کرتے ہوئے کہا کہ کوٹلی کے عوام اور پیپلز پارٹی کا رشتہ محض سیاسی نہیں بلکہ تین نسلوں پر محیط خاندانی رشتہ ہے، جو قربانی، وفاداری اور عوامی خدمت کی مضبوط بنیادوں پر قائم ہے۔ انہوں نے محترمہ بینظیر بھٹو شہید کے جلاوطنی کے دور کو یاد کرتے ہوئے چودھری یاسین کی وفاداری کو سراہا اور کہا کہ مشکل وقت میں ساتھ دینے والے ہی پارٹی کا اصل اثاثہ ہیں۔

اپنے خطاب کے دوران چیئرمین پی پی پی نے کارکنوں سے اپیل کی کہ وہ بھرپور اتحاد اور جذبے کے ساتھ ملک ظفر کی کامیابی کے لیے میدان میں نکلیں۔ انہوں نے مطلوب انقلابی کے خاندان کی خدمات کا تذکرہ کرتے ہوئے خواہش ظاہر کی کہ وہ ان کے بیٹے کو اسمبلی میں عوام کی نمائندگی کرتے ہوئے دیکھنا چاہتے ہیں۔ بلاول بھٹو نے واضح کیا کہ پارٹی ٹکٹوں کی تقسیم میں صرف ان رہنماؤں اور کارکنوں کو ترجیح دی گئی ہے جنہوں نے مشکل ترین حالات میں بھی پارٹی سے وفاداری نبھائی۔ انہوں نے عزم ظاہر کیا کہ پیپلز پارٹی نے ہمیشہ ہر عالمی فورم پر مسئلہ کشمیر کی بھرپور وکالت کی ہے اور وہ دنیا بھر میں کشمیریوں کے حقِ خودارادیت کے لیے اپنی آواز بلند کرتے رہیں گے۔