آزاد کشمیر کے مستقبل کیلئے آئینی کنونشن بلایا جانا چاہیے: بلاول بھٹو

چیئرمین پاکستان پیپلز پارٹی بلاول بھٹو زرداری نے آزاد کشمیر اور گلگت بلتستان کے مستقبل کے حل کے لیے ایک آئینی کنونشن بلانے کا مطالبہ کیا ہے۔ ذرائع کے مطابق، بلاول بھٹو زرداری نے انکشاف کیا کہ آزاد کشمیر میں انتخابی مہم کے دوران انہیں مظاہرین کی جانب سے ایک خط موصول ہوا تھا، جس کے تناظر میں انہوں نے واضح کیا کہ کشمیر کے مستقبل کا فیصلہ کسی ایک فرد یا ادارے کی جیب میں نہیں بلکہ کشمیری عوام کو خود کرنا چاہیے۔ انہوں نے کہا کہ پاکستان پیپلز پارٹی گلگت بلتستان اور آزاد کشمیر کے عوام کو حقِ حاکمیت، روزگار اور دیگر تمام بنیادی حقوق فراہم کرنا چاہتی ہے، اور اسی مقصد کے لیے ایک آئینی کنونشن ناگزیر ہے تاکہ تمام سٹیک ہولڈرز کی مشاورت سے متفقہ آئینی حل نکالا جا سکے۔ پی پی پی چیئرمین نے مزید زور دیا کہ ان کی بھرپور کوشش ہے کہ آزاد کشمیر کے انتخابات کو شفاف، آزاد اور غیر متنازع بنایا جائے تاکہ عوام بلا خوف و خطر اپنی حقیقی قیادت کا انتخاب کر سکیں۔