سندھ کو ٹیکنالوجی اور مالیات کا عالمی مرکز بنانے کا عزم؛ چیئرمین بلاول بھٹو زرداری کی صدارت میں اہم اجلاس

پاکستان پیپلزپارٹی کے چیئرمین بلاول بھٹو زرداری کی زیرِ صدارت بلاول ہاؤس کراچی میں ایک اعلیٰ سطحی اجلاس منعقد ہوا، جس میں سندھ کو مالیات، ٹیکنالوجی اور پائیدار ترقی کا علاقائی مرکز بنانے کے لیے پبلک پرائیویٹ پارٹنرشپ (PPP) کے تحت 3 اہم اسٹریٹجک منصوبوں کا جائزہ لیا گیا۔ اجلاس میں وزیراعلیٰ سندھ سید مراد علی شاہ اور دیگر حکام نے شرکت کی، جہاں کیٹی بندر انٹیگریٹڈ کوریڈور، سندھ انٹرنیشنل فنانشل سینٹر (SIFC) اور قابلِ تجدید توانائی سے چلنے والے ‘ڈیٹا انفراسٹرکچر انیشی ایٹو’ جیسے بڑے منصوبوں پر بریفنگ دی گئی۔ اس کے علاوہ چھوٹے کسانوں کو جدید زرعی سہولیات اور مارکیٹ تک رسائی دینے کے لیے ‘فارمرز ایگریکلچرل کلیکٹوز’ منصوبے پر بھی غور کیا گیا۔ چیئرمین بلاول بھٹو زرداری نے ان انقلابی منصوبوں کے کامیاب عملِ درآمد اور عالمی سرمایہ کاروں کو راغب کرنے کے لیے موجودہ پی پی پی (PPP) یونٹ کو باقاعدہ ایک کمپنی میں تبدیل کرنے اور عالمی شہرت یافتہ ٹرانزیکشن ایڈوائزرز کی خدمات حاصل کرنے کی تجویز کی توثیق کی ہے۔