5جولائی پاکستان کی جمہوری تاریخ کاسیاہ ترین باب ہے،بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری نے کہا ہے کہ 5 جولائی پاکستان کی جمہوری تاریخ کا سیاہ ترین باب ہے، اور اس دن لگنے والا مارشل لا دراصل عوام کے حقِ حکمرانی پر شب خون مارنے کے مترادف تھا۔

اپنے خصوصی پیغام میں چیئرمین پیپلز پارٹی کا کہنا تھا کہ قائدِ عوام شہید ذوالفقارعلی بھٹو نے آمریت کے سامنے سر جھکانے کے بجائے اصولوں پر سودے بازی نہ کرنے کو ترجیح دی، اور ان کا جمہوری و مساوات پر مبنی پاکستان کا خواب آج بھی زندہ ہے۔ انہوں نے اس عزم کا اعادہ کیا کہ پیپلز پارٹی آئین اور جمہوریت کے تحفظ کی جدوجہد کو ہر قیمت پر جاری رکھے گی۔ بلاول بھٹو نے شہید بینظیر بھٹو اور جمہوریت کے لیے قربانیاں دینے والے کارکناں کو زبردست خراجِ عقیدت پیش کرتے ہوئے کہا کہ بالآخر ووٹ کی طاقت ہی گولی کی طاقت پر غالب آتی ہے۔

دوسری جانب، ترجمان سندھ حکومت سعدیہ جاوید نے بھی اپنے بیان میں 5 جولائی 1977 کو پاکستان کی جمہوری تاریخ کا ایک المناک دن قرار دیا۔ انہوں نے کہا کہ ایک غیر آئینی اقدام کے ذریعے عوام کے ووٹوں سے منتخب ہونے والی حکومت کا خاتمہ کیا گیا تھا۔

ترجمان کا مزید کہنا تھا کہ پیپلز پارٹی کی سیاسی جدوجہد آج بھی ملکی تاریخ میں جمہوری شعور کی علامت ہے اور تمام قومی مسائل کا پائیدار حل صرف آئین، قانون اور مضبوط جمہوری اداروں کی بقا میں ہی پنہاں ہے۔ انہوں نے کہا کہ ہم آئین کی سربلندی کے عزم کا اعادہ کرتے ہیں؛ صدر آصف علی زرداری اور چیئرمین بلاول بھٹو جمہوریت کے اصل محافظ ہیں، اور آج ملک میں جو جمہوری نظام موجود ہے، وہ شہید محترمہ بینظیر بھٹو کی عظیم قربانی کی بدولت ہے۔