بانی پی ٹی آئی کا وزیر اعلیٰ خیبر پختونخوا سہیل آفریدی پر مکمل اعتماد ہے، انہیں ہٹانے کی خبروں میں کوئی صداقت نہیں: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر نے وزیر اعلیٰ خیبر پختونخوا سہیل آفریدی کے حوالے سے گردش کرنے والی خبروں کی سختی سے تردید کرتے ہوئے واضح کیا ہے کہ پارٹی بانی کی طرف سے انہیں ہٹانے کا کوئی پیغام نہیں بھیجا گیا۔

میڈیا سے گفتگو کرتے ہوئے بیرسٹر گوہر کا کہنا تھا کہ بانی پی ٹی آئی نے کبھی بھی سہیل آفریدی کے خلاف کوئی ہدایت یا پیغام جاری نہیں کیا۔ موجودہ حساس حالات میں اس طرح کی بے بنیاد خبریں چلانا ایک انتہائی نامناسب طرزِ عمل ہے۔ انہوں نے دوٹوک الفاظ میں کہا کہ وزیر اعلیٰ خیبر پختونخوا سہیل خان آفریدی کو بانی پی ٹی آئی کا مکمل اور غیر مشروط اعتماد حاصل ہے، اور تحریک انصاف ہر قدم پر ان کی بھرپور حمایت جاری رکھے گی۔

موجودہ ملکی صورتحال پر بات کرتے ہوئے چئیرمین پی ٹی آئی کا کہنا تھا کہ سب کو یہ سمجھنا چاہیے کہ یہ وقت حالات کو مزید خراب کرنے کا ہرگز نہیں ہے، بلکہ یہ وقت اس بات کا متقاضی ہے کہ تمام متعلقہ فریق ملک کے حالات کو بہتر بنانے کے لیے مخلصانہ کوششیں کریں۔ انہوں نے اس عزم کا اظہار کیا کہ اس وقت تمام تر کاوشیں اس امر پر مرکوز ہونی چاہئیں کہ معاملات کو مزید خراب ہونے سے بچایا جائے۔