وزیراعلیٰ اور سپیکر خیبر پختونخوا کی گرفتاری جمہوریت نہیں: بیرسٹر گوہر

پاکستان تحریکِ انصاف (پی ٹی آئی) کے چیئرمین بیرسٹر گوہر خان نے کہا ہے کہ خیبر پختونخوا کے وزیرِ اعلیٰ اور اسپیکر کی گرفتاری کسی صورت جمہوریت نہیں، جبکہ ایک مخصوص عنصر ملک اور اس کے سب سے بڑے ادارے کے درمیان دراڑیں ڈالنے کی کوشش کر رہا ہے۔

اسلام آباد میں میڈیا سے گفتگو کرتے ہوئے بیرسٹر گوہر خان نے کہا کہ مخالفین کے پاس پہلے ہی وفاق، پنجاب، سندھ، بلوچستان، گلگت بلتستان اور آزاد کشمیر میں حکومتیں تھیں، لیکن تحریکِ انصاف سے اس کی واحد صوبائی حکومت بھی چھین لی گئی۔ انہوں نے کہا کہ پی ٹی آئی ایک محبِ وطن جماعت ہے جو ہمیشہ ریاست اور مسلح افواج کی قربانیوں کے ساتھ کھڑی رہی ہے اور ملک کی مضبوطی اور معیشت کی ترقی چاہتی ہے۔

اپوزیشن لیڈر اور مذاکرات کے معاملے پر گفتگو کرتے ہوئے بیرسٹر گوہر خان نے واضح کیا کہ بانی پی ٹی آئی نے محمود خان اچکزئی کو اپوزیشن لیڈر مقرر کیا ہے اور بانی کا اعتماد حاصل رہنے تک وہی اس عہدے پر فائز رہیں گے۔ انہوں نے مزید بتایا کہ بانی پی ٹی آئی نے محمود خان اچکزئی اور علامہ ناصر عباس کو ہی حکومت یا سیاسی قوتوں سے مذاکرات کا کامل اختیار دیا ہے۔ چیئرمین پی ٹی آئی نے چیف جسٹس پشاور ہائی کورٹ سے اپیل کی کہ ان کی درخواستوں پر فل کورٹ تشکیل دے کر سماعت کی جائے اور پارٹی رہنماؤں کی بلاجواز گرفتاریوں کا سلسلہ روکا جائے۔