مولانا فضل الرحمان کو اپوزیشن اتحاد کا حصہ بنانا چاہتے ہیں: بیرسٹر گوہر

چیئرمین پی ٹی آئی بیرسٹر گوہر خان نے مولانا فضل الرحمان کو اپوزیشن اتحاد میں شمولیت کی دعوت دیتے ہوئے کہا ہے کہ تمام سیاسی جماعتوں کو ملک، پارلیمان، آزاد عدلیہ اور الیکشن کمیشن کی مضبوطی کے ایجنڈے پر متحد ہونا چاہیے۔ پارلیمانی پارٹی کے اجلاس کے بعد میڈیا سے گفتگو کرتے ہوئے انہوں نے وضاحت کی کہ فی الحال جوائنٹ اپوزیشن کا اتحاد صرف قومی اسمبلی اور قانون سازی کی حد تک محدود ہے۔ انہوں نے بتایا کہ بانی پی ٹی آئی نے اپوزیشن تحریکوں اور سیاسی امور کا تمام اختیار اسد قیصر اور علامہ راجہ ناصر عباس کو دے رکھا ہے۔ بیرسٹر گوہر نے سیاسی جماعتوں کے درمیان رابطوں کو خوش آئند قرار دیتے ہوئے کارکنان کو ہدایت کی کہ وہ سیاسی گفتگو میں شائستگی برقرار رکھیں اور نعرے بازی سے گریز کریں۔