ٹرمپ کی ایران جنگ سے امریکا پہلے سے زیادہ غیر محفوظ ہوگیا: اوباما

سابق امریکی صدر بارک اوباما نے ایران کے خلاف فوجی کارروائی کے حوالے سے صدر ڈونلڈ ٹرمپ کے جواز کو شدید تنقید کا نشانہ بناتے ہوئے کہا ہے کہ ایران کے پاس جوہری ہتھیار نہیں تھے اور سفارت کاری کے ذریعے اس کے پروگرام کو محدود رکھا جا سکتا تھا۔ 2015 کے تاریخی ایٹمی معاہدے کا حوالہ دیتے ہوئے اوباما نے کہا کہ میزائل داغنے کے بجائے سفارتی راستہ امریکی مفاد میں تھا، جبکہ موجودہ جنگی حکمتِ عملی کے نتیجے میں امریکی اتحادی، فوجی اڈے اور اہلکار شدید متاثر ہوئے ہیں۔ انہوں نے تشویش ظاہر کی کہ اس جنگ سے نہ صرف امریکا کے میزائل ذخائر میں کمی آئی ہے بلکہ آبنائے ہرمز پر ایران کے بڑھتے اثر و رسوخ کے باعث عالمی منڈی میں تیل کی قیمتوں میں بھی اضافہ ہو رہا ہے۔