نیویارک میں چاقو حملہ، بینک آف امریکا کی نائب صدر ہلاک

نیویارک: امریکی شہر نیویارک کے مشہور سیاحتی اور کاروباری مرکز ’ٹائمز اسکوائر‘ میں ایک دل دہلا دینے والے واقعے کے نتیجے میں بینک آف امریکہ کی 32 سالہ نائب صدر ایرن پیاسینٹی (Erin Piacenti) چاقو کے حملے میں ہلاک ہو گئیں۔

امریکی میڈیا اور نیویارک پولیس ڈیپارٹمنٹ (NYPD) کے مطابق ایک مسلح خاتون نے ٹائمز اسکوائر کے قریب اچانک اور بغیر کسی اشتعال کے راہگیروں پر چاقو سے حملہ کر دیا۔ اس اچانک حملے کی زد میں آ کر بینک آف امریکہ کی بزنس سلیکشن اینڈ کنفلکٹس یونٹ کی نائب صدر ایرن پیاسینٹی شدید زخمی ہو گئیں، جنہیں فوری طور پر ہسپتال منتقل کیا گیا تاہم وہ زخموں کی تاب نہ لاتے ہوئے دم توڑ گئیں۔

موقع پر موجود پولیس حکام کے مطابق حملہ آور خاتون دو چاقو لہراتے ہوئے اہلکاروں کی جانب بڑھی اور کئی منٹ تک ہتھیار پھینکنے کی تنبیہ پر عمل کرنے سے انکار کیا۔ پولیس نے ملزمہ کو قابو میں لانے کے لیے کارروائی کی، جس کے نتیجے میں حملہ آور خاتون بھی ماری گئی۔ نیویارک کے میئر اور پولیس کمشنر نے اس واقعے کو مکمل طور پر بے ترتیب اور بلااشتعال قرار دیتے ہوئے فورس انویسٹی گیشن ڈویژن کو تفصیلی تحقیقات کا حکم دے دیا ہے۔ بینک آف امریکہ کی انتظامیہ نے اپنے ایک باضابطہ بیان میں اپنی سینئر خاتون عہدیدار کی اچانک ہلاکت پر گہرے رنج و غم کا اظہار کیا ہے۔