آغا کی سنچری رائیگاں، بنگلہ دیش نے فیصلہ کن میچ میں پاکستان کو شکست دے کر ون ڈے سیریز جیت لی

بنگلہ دیش نے تین ایک روزہ میچز پر مشتمل سیریز کے آخری اور فیصلہ کن مقابلے میں پاکستان کو 11 رنز سے شکست دے کر سیریز ایک کے مقابلے میں دو میچز سے اپنے نام کرلی۔
میرپور میں کھیلے گئے تیسرے ون ڈے میں پاکستان نے ٹاس جیت کر پہلے فیلڈنگ کا فیصلہ کیا تھا۔ میزبان ٹیم نے پہلے بیٹنگ کرتے ہوئے مقررہ پچاس اوورز میں پانچ وکٹوں کے نقصان پر 290 رنز بنائے۔
بنگلہ دیش کی جانب سے تنزید حسن نے شاندار بیٹنگ کا مظاہرہ کرتے ہوئے 107 رنز کی اننگز کھیلی، جبکہ لٹن داس نے 41، سیف حسن نے 36 اور نجم الحسن شانتو نے 27 رنز بنائے۔ توحید ہریدوئے نے 44 رنز کی ناقابل شکست اننگز کھیلی۔
پاکستان کی جانب سے حارث رؤف نے تین کھلاڑیوں کو آؤٹ کیا، جبکہ شاہین شاہ آفریدی اور ابرار احمد نے ایک ایک وکٹ حاصل کی۔
291 رنز کے ہدف کے تعاقب میں پاکستانی ٹیم آغاز ہی سے دباؤ کا شکار رہی تاہم سلمان علی آغا کی شاندار سنچری نے ٹیم کو فتح کے قریب پہنچا دیا۔
سلمان علی آغا نے 106 رنز کی عمدہ اننگز کھیلی جس میں 9 چوکے اور 4 چھکے شامل تھے۔ ان کے علاوہ سعد مسعود نے 38، شاہین شاہ آفریدی نے 37 اور عبدالصمد نے 34 رنز بنائے۔
پاکستانی ٹیم آخری گیند پر 279 رنز بنا کر آؤٹ ہوگئی اور یوں بنگلہ دیش نے میچ 11 رنز سے جیت لیا۔
بنگلہ دیش کی جانب سے تسکین احمد نے چار، مستفیض الرحمان نے تین اور ناہید رانا نے دو کھلاڑیوں کو آؤٹ کیا۔
واضح رہے کہ بنگلہ دیش نے پاکستان کے خلاف 11 برس بعد ون ڈے سیریز جیتنے میں کامیابی حاصل کی ہے۔