ترجمان بلوچستان پولیس کا کانسٹیبل کے استعفے کی خبروں کے متعلق بیان جاری

ترجمان بلوچستان پولیس نے کانسٹیبل کے استعفے کے حوالے سے سوشل میڈیا پر گردش کرنے والی خبروں کی سختی سے تردید کرتے ہوئے انہیں مکمل طور پر بے بنیاد قرار دے دیا ہے۔ ترجمان کے مطابق، بلوچستان کانسٹیبلری کے ایس پی یو (SPU) اہلکار محمد ادریس نے کوئی استعفیٰ نہیں دیا بلکہ انہیں مسلسل غیر حاضری اور محکمانہ قوانین کی سنگین خلاف ورزی پر پہلے ہی ملازمت سے برخاست کیا جا چکا ہے۔ ترجمان نے واضح کیا کہ مذکورہ کانسٹیبل غیر حاضری کا عادی تھا اور 19 فروری 2025 کو پولیس میں بھرتی ہونے کے بعد سے اب تک مختلف اوقات میں مجموعی طور پر 36 روز جبکہ 23 مئی 2026 سے مسلسل ڈیوٹی سے غیر حاضر تھا۔ اتنی مختصر مدت کی ملازمت کے دوران مسلسل غیر حاضری محکمانہ قوانین کے سراسر منافی ہے، جس کے باعث کارروائی کرتے ہوئے انہیں 23 مئی 2026 کو ہی نوکری سے فارغ کر دیا گیا تھا اور برخاستگی کے بعد سے انہوں نے تاحال محکمہ پولیس سے کوئی رابطہ نہیں کیا۔