بلوچستان ہائیکورٹ نے زیارت پولیس حملہ کی تحقیقات کیلئے کمیشن قائم کر دیا

بلوچستان ہائی کورٹ نے زیارت میں ڈی آئی جی آفس کے قریب پولیس پر ہونے والے دہشت گرد حملے کی شفاف تحقیقات کے لیے بلوچستان ٹربیونل آف انکوائریز آرڈیننس 1969 کے تحت ایک تحقیقاتی کمیشن قائم کر دیا ہے۔ جسٹس محمد ہاشم خان کاکڑ کو اس انکوائری کمیشن کا سربراہ مقرر کیا گیا ہے۔ یہ کمیشن حملے کے محرکات، سیکیورٹی انتظامات میں خامیوں یا غفلت، اور حملے سے قبل موصول ہونے والی ممکنہ اطلاعات پر کیے گئے اقدامات کا باریک بینی سے جائزہ لے گا۔ کمیشن کو متعلقہ پولیس افسران، سیکیورٹی اداروں کے ریکارڈ طلب کرنے اور کسی بھی فرد کا بیان قلمبند کرنے کے مکمل اختیارات حاصل ہوں گے۔ اس کے علاوہ کمیشن عوام اور میڈیا رپورٹس کے ذریعے معلومات حاصل کر کے حتمی رپورٹ اور مستقبل میں ایسے واقعات کی روک تھام کے لیے سفارشات مرتب کرے گا۔ واضح رہے کہ زیارت میں پولیس چوکی پر حملے کے دوران دو ایس ایچ اوز سمیت متعدد اہلکار شہید ہوئے تھے۔